Na mamma e nu doluru rannu

Tutti i matini fa ra stessa strata,
‘nti mani nu mazzett’ e juri janchi,
ìnta faccia cce scolpitu nu doluru
e l’occhj sunu duj carvuni spent’.

Camina ccu nnu passu lentu, lentu,
arriva subba a porta e si fa ra crucia,
minta ‘ntu vasu i juri ca portat’,
po s’abbicina e duna nu vasu a chjddu marmu friddu ccu ‘nna foto.

Ccu ri vrazzi l’aria ricogghja e ppo’ li cadini subba u pettu scunzulata,
mentr’ de lìocchj i lacrimi li scinnini.

Chi pena ca mi fa’ quannu si vota,
assimigghja a ra Madonna addolurata,
quannu scinna ru figghju e subba a crucia.

Caterina Filippelli, 2004